آخرین مطالب
امکانات وب
به نوم هوکه رهروشت ورهزشت پاک وبی کلک وراستینه به بشریاد داد
رهروشت زیارت امومزاده ها
شیعه ها نزیکترین وابستگون دوازده امامینه مین ایرون امومزاده ایگن . امومزاده ها مین ایرون بیشتر مین دودمون لر گپ و دودمون بختیاری ارج و مهر بالایی داشتن زاو دورونی که وابا امووم هشتم بیدن وبعد زیوکه امومرضا بدست مآمون خلیف عباسی زبین رهد ، زدست خلیفه ها عباسی گروهدن و دیرولاتا وشهرها رهدن وخیلیا ز ایی امومزاده ها مین بختیاریا پناه ایوردن.بختیاریا هم که سرشت مهمون نوازی خیلی خویی واهمه کس داشتن و وامهروونی به دوست ودشمن پناه ایدادن واحترام اینهادن وبسون خذمت ایکردن به امومزاده ها هم که خیلی علاقه داشتن بسون پناه ایدادن وزسون نیه داری ایکردن وایر هم کسی زسون زدنیا ایرهد ، کل مزارا بستگون خوسون وایه فاصله ای خاکسون ایکردن وروزایی زهفته که به زیارت مزاراهه بستگون خوسون ایرهدن مزارا اونونه هم به اندازه بستگون خوسون ارج اینهادن وبه بستگون وبازموندگونسون حونه به حونه کمک مالی ایکردن . ایگون بعدها به کمک اتابکون لر ری مزاراسون به یه طورون شلکی وراورده وابید به ای شلک:مین قرن پنجم وششم که اتابکون لر پادشاه محلی بیدن بیشتر زیواتابکون لرگپ که علاقه خیلی زیادی به سادات شیعه داشتن ری مزارا امومزاده هانه ساختمونی واگنبذایی به روشت کارا هنری خوسون ایوراوردن ومین ایی ساختمونا که بنوم خوده امومزاده نوم اینهاده بیدن ، یه کوشکی چهارگوشه واضلع 50 یا 80 سانت وبه بلندی قریب یه متر به قولی به شلک مکعب مستطیل راست کردن بی . وبا یه پارچه سوز تمیزوگل ومنگول کرده ریسه ایپوشوندن که بس صندوق امومزاده ایگدن . ری صندوقنه هم وا مهر وتزبه ویه جلد قرون وچیا قیمتی بجامنده زخوده امومزاده وبرداهه گرد وقیمتی وچیا زینتی دیری ملث مهره ولوپک وبعضی مودا بشقه و بندسیزن زینت ایدادن .سالاهه بعد یه زنجیرینه که دورس شیردنگی گل ومنگول کرده دورس ایپیچوندن دوسرسه بالا صندوق به سقف یا به دیوار میخ ایزیدن یا ایبستن . سالاهه اول مردمی که سی احترام سرمزاراهه بستگونسون ایرهدن مین ایی امومزاده ها هم ایرهدن وفاتحه ای ایخوندن سیسون زخدا آمرزش ایخواستن وآخرسر پیلی یا چیا قیمتی دیری سی بستگون وبازموندگونسون سر صندوق اینهادن وایرهدن(او دورون ایی کمکانه حونه به حونه زچیا وخردنیهاهه جوراجوردیری ماهونه یا روزونه به بستگونسون کمک ایکردن). البته یونه هم وابدونیم که دورون حکومت مغول بید ومغولا هم خیلی احترام به سادات شیعنه داشتن .همه جامنده هاهه ایرونیانه خراو ایکردن جلازه جامنده هاهه امومزاده هانه. اتابکون لرگپ هم زایی مجال استفاده ایکردن و جامنده هاهه ایرونینه نوم سادات سرسون اینهادن که حکومت مغول لطمه ای بسون نزنن و الان معلوم نید کونو ز جامندهاهه پیش ز اسلامن.هرچه سالها بیشتری ز ایی امومزاده ها ایگدشت ،نلساهه بعدی هم گموناهه بیشتر وکهنه تری ز کرامات و معجزه هاهه امومزاده ها داشتن وحکایتاهه بیشتری ایشنیدن وراست ایکردن.منی ایی عقیده ها حالت شراوینه داره که ایگون هرچی کهنه تر وابید اثراهه بیشتر داشته . به جایی رسیدن که امومزاده هانه به اندازه خدا ایپرسنیدن ، ز امومزاده ها حساب بیشتری ایبردن. سی راست ودرو به امومزاده ها قسم ایخردن ، عهد وپیمونانه مین امومزاده ها ایبستن وبه امضا سیدون ایرسوندن. منستی که براستی امومزاده ها زنده ین. هردورونی که ایگدشت ، رهروشت تازه تری سی زیارتاهه امومزاده ها آفریده وابید. وزیارتاهه امروزی امومزاده تا حالا به ایی شلکه. پیش ز زیارت وا لواسا ششته وتمیز بوهن ، وخو حموم کرده بوهن وغلسی به نیت زیارت بکنن وچیا خوشبویی ملث مشک وعطر وگلاو به خوسون بزنن. یه ذره پرچلی کدسون نبوهن. بستگونی که نترستن به زیارت برن سفارش دعا وحاجتسونه به زایرون ایکردن. بعضیاسون ز مهر امومزاده رهه درازینه پاپتی ایرهدن . به ولات امومزاده که ایرسیدن تیسون که به گنبذ امومزاده ایورخرد ایوایستادن سلام ایدادن ودعا ایکردن و فاتح ایخوندن . عقیده داشتن که دل وروحسونه هم ملث تنسون پاک وبی کینه وکدورت بوههن. بدم درگاه اموم زاده که رسیدن سلام ایدادن وفاتحه ایخوندن وادعا اجازه وادراویدن زامومزاده ایخواستن اونوکه کوش پاسون بید به یه فاصله کمی زدرگه کوشانه دراوردن. به درودرگه که ایرسیدن درودرگهنه ایبوسیدن وتیگ اینهادن وااحتیاط واحترام زیاد مین امومزاده ایرهدن. دست به زنجیر ایگرهدن وسی خوسون وبستگونسون دعاایکردن وحاجت ایخواستن. سه کرت به دور صندوق درایخردن چیاویادگارایی که زامومزاده سرصندوق بید ایبوسیدن ودرز تیگ اینهادن . چیایی ملث بردا گرد وقیمتی نشقدار قرون ومهر وتزبه. وبعد دورکعت نماز به نیت زیارت ایخوندن وگوشه ای مخصوص به نیت خواسته ها وبه یاد مرده هاسون شمایی روشن ایکردن که شاید شمع روشن کردن یادگاری ز پیش اسلام بوهه. وپیلی به نوم نرز به ری صندوق اینهادن وآخرسروا احتیاط واحترام عقو عقو محل امومزادنه ترک ایکردن وپشت سرهم دعا ایخوندن تا فاصله ای زدرگه عقو عقو ایرهدن وکوشانه ایپوشیدن و وادل شاد وبی کینه وپاک محلنه ترک ایکردن .البته یادمون نره که هرسیدی زبستگون امومزاده سی یه طافه انتخاو ایبید که هروخت زایر ایخواست پیشسون به مهمونی برن یاپیلی به نوم نرز بدن به اونو ایدادن وپیش اونو ایرهدن ایر نیازی بید وفرصت ورگشتن نبید شوابه مهمونی پیش اونو ایرهدن وشونه بسرایکردن .وروز بعد وامهر وارج نهادن خداحافظی ایکردن محلنه به طرف حونه هاسون ترک ایکردن. دلاتون بی خرافه و کینه وکلک بوهن و پاک وبی غل وغش وراستی ودرستی هم پیشتون بوهه.
سرفراز وسردیار وبختیار بوهین.
جلال اسفندیاری غریبوند.5/5/96